Shtëpia botuese tiranase “Onufri” e ka botuar romanin “Lindur së prapthi” të shkrimtares së njohur shqiptare, Rita Petro.

Romani është mirëpritur nga studiuesit e letërsisë dhe lexuesit kureshtarë dhe të interesuar për letërsinë e tashme shqipe.

“Lindur së prapthi” i Rita Petros është një rrëfim interesant që hyn në rrethin kulturor të asaj që cilësohet si letërsi e kujtesës.

Është rrëfim personal për një brez të humbur, për një fëmijëri dhe rini të humbur që më shumë kishte ndalesa e shtrëngime shoqërore, kulturore e politike se sa fëmijëri dhe adoleshencë të natyrshme.

Është një rrëfim i veçantë për vitet e diktaturës nga një këndvështrim infantil dhe të një njomzake të pafajshme, që përpara mundësive dhe kënaqësive të moshës, duhet t’i përbrendësonte kodet e një sjelljeje nën trysni dhe diktat politik.