Kandidati për kryetar të Junikut, nga radhët e Lidhjes Demokratike të Kosovës, Ruzhdi Shehu, përmes një postimi në rrjetin social, ka premtuar realizimin e kompleksit turistik “Gjeravica”. Për më tepër, Shehu ka thënë se përmes projekteve në turizëm do të ndikojnë në punësimin dhe zhvillimin e Junikut.

Postimi i tij i plotë në rrjetin social facebook:

“Të dashur junikas,

Turizmi është një nga potencialet kryesore që ka Juniku. Prandaj investimet në turizëm do të jenë prioriteti im kryesor.

Juniku ka nevojë për zhvillimin e turizmit ekologjik të bazuar në agrokulturë dhe të përkrahur nga shërbime cilësore komunale. Prandaj gjatë qeverisjes tonë do të realizohet Kompleksi Turistik
“Gjeravica” të cilit do t’i paraprijë Master-Plani përkatës si dhe përfundimi i rrugës Junik-Bjeshkë.

Do investohet po ashtu në infrastrukturën e integruar në fshatrat Gjocaj dhe Jasiq si dhe do të përkrahen me skema sociale bujqit, fermerët dhe ndërmarrësit e Junikut. Pra do të investohet në turizmin veror dhe dimëror, pastaj në turizmin malor, urban, kulturor dhe shëndetësor. Në këtë mënyrë zbatimi i projekteve tona në turizëm do të zvogëlojë papunësinë në Junik dhe do të garantojnë një zhvillim ekonomik dhe një mirëqenie e cila ka munguar tash e 12 vite.”