Zëvendëskryeministri i Kosovës, njëherit kandidat për deputet nga Lidhja Demokratike e Kosovës, Driton Selmanaj, ka thënë se pejanët e kanë zgjedhjen e vetme, LDK-në.

Nga Peja e besës dhe Haxhi Zekës, Selmanaj ka thënë se strukturat janë të bashkuar me plot motiv e zëll për fitoren e radhës.

Selmanaj ka thënë se Peja dhe pejanët njohin më mirë se kushdo tjetër qeverisjen e mirë të LDK-së.

“Në Pejën e besës dhe të Haxhi Zekës! Të bashkuar, përplot zell e motiv për punë e fitore, i gjetëm në Pejë strukturat, anëtarët dhe simpatizantët e shtëpisë tonë të madhe, Lidhjes Demokratike të Kosovës”.

“Peja dhe pejanët njohin më mirë se kushdo tjetër qeverisjen e mirë të LDK-së. Dikur e katandisur si mos më keq nga krimi, zhvatja e parasë publike, e haraqi. Sot, Pejës i është kthyer shpresa, zhvillimi, e mirë qeverisja”, ka thënë Selmanaj, shkruan Insajderi.

Sipas Selmanajt, Peja jo më kot quhet Lule e Dukagjinit, e lule e tillë do mbetet për aq sa me të do të qeverisë Lidhja Demokratike e Kosovës.

“Për Pejën dhe krenarinë e Kosovës, Rugovën. Për Borenë, basketbollin e xhudistët e Pejës. Për artin, kulturën dhe traditat pejane. Për burrat e besës e të fjalës që ka Peja. Për gratë dhe vajzat e zonja e fisnike të vendit. Për të rinjtë plot shpresë, vullnet e dashuri për atdheun”, theksoi ai.

LDK, sipas tij, është e do mbetet zgjidhja e vetme, garantuesja e vetme e zhvillimit, prosperitetit dhe mirë qeverisjes të vendit. Insajderi.org