Shefi i EULEX-it në Kosovë, Giovanni Pietro Barbano, deklaroi se nevojitet një system prokurorial I pavarur, i lirë nga presioni politik. Deklaratat e tij erdhën në kohën kur presidentja e Kosovës, Vjosa Osmani, vendosi për mos-dekretimin e Blerim Isufajt për kryeprokuror dhe filloi linçimin publik ndaj tij.
Barbano këtë e ka deklaruar përgjatë një takimi me kryesuesin e Këshillit Prokurorial të Kosovës (KPK), Jetish Maloku, teksa ka thënë se shpreh shqetësimin që prokuroria s’ka ende kryeprokuror.
“Bashkëbisedim substancial me Kryesuesin e Këshillit Prokurorial të Kosovës, Jetish Maloku. Vlerësova bashkëpunimin e vazhdueshëm mes EULEX-it dhe prokurorive të ndryshme, dhe ritheksova mbështetjen tonë për një sistem prokurorial plotësisht të pavarur, të lirë prej presionit/ndërhyrjes politike”, tha ai përmes platformës ‘X’.
“Unë po ashtu shpreha shqetësimin e thellë për faktin se prokuroria e Kosovës ende nuk udhëhiqet zyrtarisht nga një kryeprokuror i shtetit i emëruar, duke patur parasysh ndikimin negativ të kësaj situate mbi funksionimin prokurorial nga perspektiva e sundimit të ligjit”, vijoi më tej shefi i EULEX-it në Kosovë.
Deklaratat e tij vjen në kohën kur presidentja e vendit “futi duart” në sistemin e drejtësisë duke kritikuar Isufajn pasi nuk e dekretoi për kryeprokuror. /Insajderi.org/