Shefi i Grupit Parlamentar i PDK-së, Adem Grabovci,  është personi më i komentuar prej fillimit të javës pas publikimit të përgjimeve “Dosja e Shefave” nga gazeta Insajderi ku shfaqet pa asnjë dilemë personi më i fuqishëm në prapaskenën e kontrollit të shtetit, por të mërkurën në debatin për demarkacionin ai ka thënë se ka disa dilema për kufirin e vendit me Malin e Zi.

Në këtë debat ai ka thënë se nga argumentet e dhëna në debatin që është duke vazhduar ende, i janë krijuar dilema lidhur me atë se a humb Kosova territor me demarkacion apo jo.

Ai ka thënë se ka ende nevojë që të bindet për këtë gjë.

“Edhe mua ma kanë krijuar një dozë të rezervës, por edhe si dëshmitarë po ashtu kam insistuar dhe jam konsultuar me pjesën më të madhe të këtyre ekspertëve, kam nevojë ende që të bindem mbi të vërtetën dhe asnjëherë nuk do të pajtohem që të marrim vendime që bien ndesh me interesin e vendit, tërësinë territoriale”, është shprehur Grabovci.

Grabovci ka shtuar se askush nuk e do më pak apo më shumë Kosovën, dhe se për interesin e vendit dhe të qytetarëve duhet të ketë angazhim të madh.

Sipas tij, PDK-ja do t`i marrë të gjitha argumentet e faktet dhe do t`i analizojë. Më pas, ka shtuar ai, do të dalin në përfundim duke u bazuar mbi argumente./Insajderi.com