Ekspertët e aviacionit analizuan rrëzimin e avionit që ndodhi në aeroportin e Tokios, dhe në mënyrë specifike iu referuan faktit se materialet moderne në fakt i shpëtuan pasagjerët nga vdekja pothuajse e sigurt.

Sipas një analize të Telegraph, kjo është hera e parë që një Airbus A350 shkatërrohet në një aksident, transmeton Telegrafi.

“Ky model është aeroplani i parë i pasagjerëve që është bërë kryesisht nga kompozita me fibra karboni”, tha gazetari Andreas Spaeth.

Ai gjithashtu tregoi se ishte një aeroplan i ri.

“Të shohësh të gjithë sesi u evakuuan në mënyrë të sigurtë është një mrekulli e vërtetë. Ne kurrë nuk kemi parë një byk me fibër karboni të digjet më parë. Struktura është mbajtur mjaft mirë”, thekson Spaeth.

Ishte fakti që aeroplani ishte bërë nga fibra karboni, sipas Spaeth, ai që kontribuoi në parandalimin e një tragjedie më të madhe.

“Ka Boeing 787 dhe Airbus 350 si aeroplanë të bërë nga fibër karboni në vend të aluminit. Brendësia ka gjithashtu materialet më të fundit për mbulesat e ulëseve, mbulesat e mureve dhe qilimat. Kemi standarde shumë strikte këto ditë. Normalisht nuk do ta shihni kurrë në jetën reale se si këto materiale sillen në të vërtetë në një zjarr të madh, kështu që ky ishte konfirmim që standardet i shërbejnë qëllimit”, shpjegon Spaeth.

Themeluesi dhe drejtori i Byrosë së Sigurisë së Aviacionit në Gjermani, Jan-Arwed Richter, ra dakord me deklaratën se fibra e karbonit luajti një rol kyç.

“Çdo aeroplan modern është projektuar, prodhuar dhe certifikuar për të lejuar një evakuim të sigurt brenda 90 sekondave. Ky aksident tregoi se koncepti funksionon”, shpjegon ai.

Shumë ekspertë kanë vlerësuar pilotët dhe ekuipazhin e kabinës së Japan Airlines, të cilët i nxjerrin shumë shpejt pasagjerët pa marrë çantat.

“Ky është një rezultat i jashtëzakonshëm dhe mendoj se ka disa njerëz që ishin veçanërisht të lumtur sot. Mesazhi këtu është me të vërtetë i rëndësishëm. Nëse diçka e tillë ju ndodh, ju keni një shans dhe një prioritet, që është të evakuoheni”, shpjeguan ata.