Tre të dyshuarit për vrasjen e Liridona Ademajt, në mesin e tyre edhe bashkëshorti i saj Naim Murseli, do të dalin sot para Gjykatës Themelore të Prishtinës ku do të mbahet seanca dëgjimore nga ora 09:30.
Lajmin e ka konfirmuar për Gazetën Insajderi zëdhënësja e Gjykatës Themelore në Prishtinë, Mirlinda Gashi.
Ndërkaq, Prokurorja e Shtetit ka përpiluar kërkesën për paraburgim për Naim Murselin dhe dy të tjerëve që dyshohen për vrasjen e Liridona Ademajt.
“Kërkesa për caktimin e masës së paraburgimit është përpiluar nga Prokurorja e Shtetit ndaj tre personave të dyshuar, të përfshirë në rastin e vrasjes së rëndë dhe brenda afatit ligjor do të delegohet në gjykatë”, tha dje për Insajderin zëdhënësja e Prokurorisë Themelore të Prishtinës, Laureta Ulaj.
Liridona Ademaj Murseli u vra të mërkurën mbrëma gjatë një grabitjeje të armatosur në Sinidoll të Prishtinës, ndërsa bashkëshorti i saj me fëmijët kanë arritur që të ikin nga vetura.
Ajo është varrosur të premten në Cërmjan të Gjakovës.
Bashkëshorti i Liridonës, Naim Murseli, personi me inicialet G.P., që dyshohet të jetë vrasësi i Liridona Ademajt dhe personin e tretë me iniciale K.K., u arrestuan të premten nga Policia e Kosovës.