Ministri i Punëve të Brendshme, Xhelal Sveçla, ka reaguar pasi një qytetare serbe u gjet e vdekur këtë të premte në lumin Ibër afër fshatit Zhitkovc të Zveçanit.

Sveçla njoftoi se viktima është 49-vjeçare dhe tha se e njëjta dyshohet se në lum ka rënë para dy ditësh.

“Shoqata e Kosovës për kërkim dhe shpëtim, zhytësit e klubit “Trepça”, Policia e Kosovës, Agjencia e Menaxhimit Emergjent dhe banorët e fshatit Zhitkovc të Komunës së Zveçanit, kanë arritur të gjejnë sot trupin e pajetë të qytetares J.Petrovic, 49 vjeçare, e cila dyshohet se kishte rënë para dy ditësh në lumin Ibër”, ka shkruar Sveçla në Facebook.

Ai ka shprehur ngushëllime familjes Petrovic, ndërsa ka falënderuar të gjitha ekipet dhe qytetarët e angazhuar për bashkëpunimin e kontributin në gjetjen e të zhdukurës.