Familja Smajli ia ka shtrirë dorën e pajtimit familjes Kuka në Pejë. Kjo ndodhi një muaj pasi Policia e Kosovës njoftoi për tentim-vrasje nga grupi i Kukajt ndaj një anëtari të familjes Smajli. Insajderi kishte raportuar ekskluzivisht për këtë ngjarje.

Për pajtimin e dy familjeve ka njoftuar deputeti i AAK-së, Bekë Berisha, nga radhët e zonës së Dukagjinit përmes një postimi në ‘Facebook’, shkruan Gazeta Insajderi.

“Familja Smajli shtrinë dorën e pajtimit familjes Kuka në Pejë. Jo rrallëherë befasohem me burrerinë që tregojnë sidomos të rinjtë në Dukagjin. Dhashtë Zoti e do ti mbyllim shum plagë të familjeve në Pejë. Na priftë e mbara”, përfundon postimi i tij.

Gazeta Insajderi pati raportuar ekskluzivisht se dy personat që ishin arrestuar dhe një person i tretë që dyshohej se ishte në arrati ishin familjarë të trajnerit të njohur të Xhudos – Driton Kukës.

Të arrestuar për rastin ishin Kukë Kuka bashkë me një person tjetër.