Manchester City është kritikuar nga tifozët e futbollit në mediat sociale pasi dyshohet se refuzuan medaljet e tyre të nën-kampionëve në finalen e Superkupës së Anglisë apo Community Shield të shtunën në mbrëmje.

Kampionët në fuqi të Ligës Premier pësuan një humbje 3-1 nga Liverpooli në King Power Stadium.

Zëvendësuesi Julian Alvarez zhvlerësoi në minutën e 70-të, golin e parë të Trent Alexander-Arnold (21’), por golat e vonshëm nga Mohamed Salah dhe Darwin Nunez i dhanë Liverpool trofeun e parë të sezonit 2022/23.

Kjo humbje thuhet se ka lënë shije të hidhur te lojtarët e Cityt, të cilët raportohet se kanë refuzuar t’i pranojnë medaljet e argjendta.

A refuzoi Man City të merrte medaljet e Community Shield?

Faqja sportive ITV Sport pretendoi se lojtarët e Cityt zgjodhën të mos pranonin medaljet e nën-kampionëve të përcaktuara për ta.

Në të vërtetë, lojtarët e Cityt nuk u panë duke pranuar medaljet e tyre përpara se lojtarët e Liverpoolit të merrnin medaljet e arta dhe të ngrinin lartë trofeun e Community Shield.

Pep Guardiola: Man City i pranoi medaljet

Trajneri i Cityt, Guardiola insistoi se këto akuza ishin të pabaza gjatë intervistës së tij pas ndeshjes me ITV.

“Lojtarët tuaj nuk i morën medaljet e tyre, ata nuk i pranuan medaljet…”, iu drejtua gazetari – Guardiolas, i cili ndërhyri menjëherë, duke u përgjigjur: “Sigurisht që i pranuam medaljet”.