Vdekja e 21 vjeçares nga Podujeva ditën e djeshme, ka tronditur opinionin publik. Ajo ishte prekur me koronavirus dhe sapo kishte lindur foshnjen, kishte ndërruar jetë.

Por dyshime për vdekjen e saj janë ngritur më pas. Komentues të shumtë kanë shkruar se 21 vjeçarja nuk kishte humbur jetën si pasojë e koronavirusit por nga pakujdesia e mjekëve, shkruan Insajderi.org

Një koment në rrjetet sociale, profil i njohur për Gazetën Insajderi, ka shkruar se 21 vjeçarja nga Podujeva nuk ka vdekur nga Covid-19 por nga pakujdesia e mjekëve.

“Nuk është e vërtetë që ka vdek prej virusit se pacientja ka qenë që dy javë në spital por nga pakujdesia e mjekëve ka vdekur sepse me pacientën kam qenë në dhomë. Ka pasur gjakderdhje të madhe por asnjë mjek nuk ka ardhë tri orë as me e vizitu, më vjen keq për të ndjerën se ka vuajt shumë por ata mjekë Zoti i vraftë…”, thuhet në komentin e lexueses.

Ky është rasti i parë që vihet në dyshim vdekja e pacientëve gjatë kësaj periudhe të pandemisë. Shumë qytetarë shprehën të bindur se disa nga viktimat që janë të prekur me koronavirus, nuk kanë vdekur si pasojë e covid-19./Insajderi.org/