Anëtarësimi i Donika Kadaj-Bujupit në Lëvizjen Vetëvendosje pa u bërë një muaj pas dorëheqjes nga Aleanca për Ardhmërinë e Kosovës, nuk është bërë e qartë nga partia e re e deputetes.

Vetëvendosje nuk e ka sqaruar nëse ishin ata që e ftuan Kadaj-Bujupin të bëhej anëtare e partisë apo ishte ajo që kërkoi të aderonte në këtë parti.

Frashër Krasniqi, zëdhënës i VV-së nuk i është përgjigjur pyetjes specifike të Insajderit, por ka theksuar se e gjitha qa është dashur të thuhet, është thënë në Këshillin e Përgjithshëm të kësaj partie.

Por këtë nuk e ka sqaruar as Donika Kadaj-Bujupi  në fjalimin e saj para anëtarëve të Këshillit të Përgjithshëm të VV-së, raporton Insajderi.

Ajo ka thënë se e zgjodhi VV-në për hir të parimeve dhe ka qenë një zgjedhje mes paqes dhe drejtësisë.

“Unë u përcaktova për drejtësinë dhe mu për këtë sot jam këtu në mesin tuaj”, ka thënë Kadaj-Bujupi gjatë fjalimit të saj në mbledhjen e Këshillit të Përgjithshëm të VV-së, të mbajtur sot.

Kadaj-Bujupi kishte dhënë dorëheqje nga AAK në fund të marsit pikërisht në kohën kur mosmarrëveshjet mes dy partive opozitare nisën të dalin në shesh.

Atë kohë nuk e kishte përmendur vendimin e saj për të aderuar në VV por në vend të kësaj kishte thënë se po largohet nga AAK-ja për shkak të vendimeve të njëanshme në parti./Insajderi.com