Trajneri i Barcelonës, Xavi Hernandez, ka pranuar se ka mbetur tejet i zhgënjyer me francezin Ousmane Dembele.

Në një intervistë të mërkurën, Xavi ka konfirmuar se Dembele dëshiron t’i bashkohet Paris Saint-Germainit gjatë kësaj vere. Ai ka thënë se ditëve në vijim pritet që Dembele ta kompletojë transferimin e tij nga Barcelona te Parisi.

“Dembele na ka thënë se dëshiron të largohet dhe unë jam i zhgënjyer me të. Ai ka një ofertë të mirë nga Parisi dhe ne nuk mund të bëjmë asgjë në këtë aspekt”, ka pranuar Xavi.

Parisi ka vendosur ta paguajë klauzolën e lirimit të sulmuesit të krahut, i cili pati paraqitje të mira edicionin e shkuar te Barcelona.

26-vjeçari shënoi 8 gola dhe bërë 9 asistime në të gjitha garat për Barçën, ekip të cilit iu bashkua në vitin 2017 nga Borussia Dortmundi. Kontrata e tij me ekipin spanjoll i skadon në vitin e ardhshëm.