Gjatë një marrjeje në pyetje me Prokurorin e FIGC muajin e kaluar, mesfushori i Juventusit, Nicolo Fagioli zbuloi se Sandro Tonali i kishte shpjeguar se si të përdorte një aplikacion për baste të paligjshme ndërsa ishte në detyrë ndërkombëtare me Italinë U21 gjatë vitit 2021.

Gazeta italiane Tuttosport publikoi dokumentet e intervistës së Fagiolit me prokurorin e FIGC Giuseppe Chine në shtator 2023.

Fagioli pranoi se kishte grumbulluar borxhe dhe ishte kërcënuar nga pronarët e platformave të paligjshme të basteve, të cilëve u kishte borxh para. Ai tha se filloi të luante kumar sepse kishte “shumë kohë të lirë”.

“Periudha më e keqe që e kam pasur ishte mes marsit dhe prillit 2023, kur kam qenë aq i stresuar dhe i frikësuar sa gjatë ndeshjes mes Sassuolo-s dhe Juventusit kam bërë një gabim, pas të cilit jam zëvendësuar. Sapo dola nga fusha fillova të qaja duke menduar për problemet e mia që lidhen me borxhet e lojërave të fatit. Tashmë kam grumbulluar një borxh të madh prej 250 mijë eurosh në shtator 2022 dhe presioni u rrit nga pronarët e faqeve të paligjshme, të cilët më detyronin të ktheja paratë. Herë pas here, të paktën të ktheja një pjesë të atyre parave. Nuk flija natën. Sa më shumë kalonte koha, aq më shumë më përndiqte borxhi. Paratë që duhej të paguaja vazhdimisht rriteshin. Arkëtorët e borxheve më thanë se do të më thyenin këmbët. Kam vënë bast për ndeshje futbolli dhe tenis. Fillova në verën e vitit 2021. Nuk pyesja veten nëse ato faqe ishin të ligjshme apo jo. Ishte argëtuese. Që nga janari 2022, jam i stresuar me borxhin e akumuluar. U kam borxh edhe shokëve të skuadrës. Gatti mi dha hua disa para dhe ende nuk ia kam kthyer” ka thënë Fagioli në dëshminë e tij.