Presidenti ukrainas, Volodymyr Zelenskiy paralajmëroi të dielën se Rusia po “planifikon sulme të reja” ndaj vendit Ukrainës, duke u bërë thirrje forcave të mbrojtjes dhe qytetarëve që të përgatiten për t’i bërë ballë një jave të re me tensione.

Moska ka vënë në shënjestër infrastrukturën në javët e fundit, duke shkaktuar ndërprerje të energjisë elektrike dhe duke vrarë civilë. Kështu sulmet ruse kanë lënë miliona qytetarë pa energji elektrike dhe pa ngrohje, pasi temperaturat kanë rënë nën 0 Celsius, transmeton Insajderi.

“Ne e kuptojmë se terroristët po planifikojnë sulme të reja. Ne e dimë këtë,” tha Zelenskiy në fjalimin e tij me video që e publikoi të dielën.

“Dhe për sa kohë që ata kanë raketa, ato, për fat të keq, nuk do të qetësohen” – shtoi ai.

Kremlini javën e kaluar mohoi se sulmet në rrjetin elektrik të Ukrainës kishin për qëllim civilët, por tha se Kievi mund t’i “ndal vuajtjet” e popullsisë së tij duke përmbushur kërkesat e Rusisë për të zgjidhur konfliktin.