Takimi i mbajtur sot nga Zyra e Rregullatorit për Energji (ZRRE) me përfaqësues të mediave, që kishte për qëllim diskutimin e procesit të përshtatjes së tarifave të energjisë elektrike, është përcjellë me pakënaqësi nga ana e gazetarëve, për shkak të mosrespektimit të kushteve të paralajmëruara paraprakisht nga vetë ZRRE-ja.
Gazetarët e konsideruan këtë si një mungesë transparence dhe devijim nga zotimet fillestare të ZRRE-së.
Sipas ftesës së ZRRE-së dërguar mediave, ishte paralajmëruar se xhirimi me kamerë do të lejohej në dhjetë minutat e para të takimit. Mirëpo, në momentin e zhvillimit të tij, një gjë e tillë nuk është lejuar, duke nxitur reagime dhe pakënaqësi nga gazetarët pjesëmarrës.
“Në fillim, dëshirojmë t’ju falënderojmë për interesimin e vazhdueshëm lidhur me procesin e përshtatjes së rregullt tarifore. Vlerësojmë angazhimin dhe kontributin tuaj në këtë proces të rëndësishëm. Në vazhdim, ZRRE-ja shpreh gatishmërinë e saj për të zhvilluar një takim me mediat, me qëllim të diskutimit të çështjeve kryesore të këtij procesi dhe për të adresuar çështjet që janë me interes të përbashkët. Takimi do të jetë mundësi për shkëmbimin e mendimeve dhe për të thelluar kuptimin mbi rëndësinë dhe ndikimin e këtij procesi.
Për arsye të kufizimit të hapësirave, kërkohet që secili medium të dërgojë një përfaqësues për të marrë pjesë në takim.
Takimi do të mbahet me datë 07.04.2025 (e hëne), në orën 10:00, në zyrat e ZRRE-së, dhe inqizimi me kamerë do të lejohet vetëm në dhjetë minutshin e parë, pastaj do të vazhdohet me diskutimin e planifikuar. Gjatë diskutimit nuk lejohet inqizimi me zë apo kamerë”, thuhej në njoftimin e ZRRE-së./Ekonomia Online/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
