Kryeminsitri i Kosovës, Albin Kurti ka reaguar pas tensioneve në veri të vendit.

Përmes një postimi në facebook ai ka shkruar se bandat kriminale në veri të Kosovës e dinë se po iu vie fundi.

Kurti shkroi se Qeveria e Kosovës nuk bënë pazare e as nuk i duron ato. Sipas tij, të gjitha mjetet që ata përdorin shpërfaqin pafuqinë politike e popullore.

“Bandat kriminale kanë intensifikuar sulmet në veri të Kosovës. Ato e dinë se po ju vie fundi. Qeveria e Kosovës as s’bën pazare me to dhe as s’i duron ato. Bombat që hedhin, plumbat që shkrepin dhe maskat që vendosin janë pafuqia e tyre politike e popullore”, ka shkruar Kurti

Ai shtoi se në veri do të ketë më shumë polic dhe se do të ketë hetime e ndjekje të kriminelëve.

Kreu i ekzekutivit tha se kërkon nga qytetarët e Kosovës që ta mbështesin shtetin dhe policinë.

“Me këto krime e sulme të armatosura në veri të Ibrit, doemos do të kemi më shumë polici të Kosovës atje. Sepse do të ketë hetime e ndjekje të këtyre kriminelëve, që paguhen nga Serbia e dirigjohen nga presidenti i saj. Shkeljet e shumta të ligjit nuk do të falen kurse tendencat për destabilizim kriminal do të dështojnë. Në katër komunat në veri nuk është ndarja në serbë e shqiptarë, por në banda kriminale dhe qytetarë. Kërkoj nga të gjithë qytetarët e Kosovës që të mbështesin shtetin dhe policinë e Kosovës, të gjithë zyrtarët tanë që po mbrojnë kushtetutshmërinë dhe ligjshmërinë, republikën dhe demokracinë”, ka shkruar Kurti në facebook.