Ish- prokurori i akuzuar për korrupsion të nivelit të lartë, Metush Biraj po respektohet fortë nga Komuna e Prizrenit. Ndonëse, ndaj tij është ngritur aktakuzë për marrjen e 20 mijë eurove si ryshfet për lirimin nga fajësia të dy narkodillerëve, atij i rezervohet një ulëse në ballë të Kuvendit Komunal të Prizrenit, shkruan Insajderi.

Metush Biraj i cili është edhe familjar i kryetarit të Prizrenit, Shaqir Totaj është ulur në ulëset kryesore të sallës së Kuvendit komunal me rastin e mbajtjes së ceremonisë solemne për të shënuar  25 vjetorin e rifunksionimit të Komunës së Prizrenit, të parit institucion që nisi punën në Kosovën e çliruar nga pushtimi serb.

Në ceremoninë e mbajtur në sallën e Kuvendit Komunal, ishin udhëheqësit më të lartë të asaj kohe, ish-drejtorë komunal e shumë veprimtarë të respektuar, të cilët kishin dhënë kontribut para dhe gjatë luftës.

Pjesë e saj shihet në fotografi edhe Ish-prokurori Biraj, pjesë dikurshme e stafit ekzekutiv, por që tash ka aktakuzë të ngritur për korrupsion të nivelit të lartë.

Ndryshe në mars të këtij viti u njoftua për ngritjen e aktakuzës ndaj Birajt, për marrje ryshfeti nga Shkodran Pulaj dhe Naim Osmani. Sipas raportimi të Gazetës Insajderi, ata i ofruan ryshfet për të cilën, sipas aktakuzës, Biraj e pranoi. Vlera e ryshfetit ishte 20 mijë euro, në mënyrë që ai të tërhiqej nga hetimet ndaj Naim Osmanit, Ukë Sadrijajt dhe Arbër Salihut “në mungesë provash”. Biraj në fjalën e tij e ndjekte “zërin e ndërgjegjes” tërhiqej nga aktakuza në rastin e Osmanit.

Po ashtu sipas raportimit të Gazetës Insajderi, Biraj është në marrëdhënie familjare me kryetarin e Prizrenit, Shaqir Totaj ( përkatësisht nipi apo djali i motrës së babës ). Në prag të pensionimit, Biraj kishte trajtuar edhe lëndë ndaj sektoreve komunale, që janë në vartësi të Totajt, duke hedhur poshtë Kallëzimet Penale.

Në qershor, u njoftu se Gjykata e Apelit ka marrë aktvendim që aktakuza e ngritur ndaj Metush Birajt, për marrje ryshfeti, të kalojë në kompetencë lëndore të Prokurorisë Speciale.

Si rrjedhojë, aktvendimi për fillimin e hetimeve dhe aktakuza ndaj tij, do duhej të merreshin nga Prokuroria Speciale, duke qenë se pozita e tij është pozitë e lartë publike, dhe jo nga Prokuroria Themelore në Gjilan.

IN Promo Marketing

Pijet Tona, Shija Juaj!

Udhëto nga Baseli drejt Prishtinës, përfitoni nga ofertat speciale!

Suksesi i radhës për ‘R & Rukolli Group’: Pijet e reja depërtojnë në tregun gjerman