Prokuroria e Pejës ka nisur një hetim në lidhje me dyshimet për keqpërdorime me patentë-shoferë në këtë pjesë të Kosovës.

Kështu ka bërë të ditur për Gazetën Insajderi Shkodran Nikqi, zëdhënës i Prokurorisë Themelore në Pejë, ai tha se për shkak të fazes se hetimit nuk mund të japin më shumë informacione.

“Departamenti i krimeve te renda ne Prokurorine Themelore ne Peje eshte duke e hetuar rastin. Per shkak te ndjeshmerise se hetimeve kete faze nuk mund te japim informata”, tha ai.

Dyshimet për keqpërdorime janë ngritur dje nga zëvendësministri i Ministrisë së Infrastrukturës, Hysen Durmishi.

Në një konferencë për media ka thënë se Prokurorisë së Pejës i ishte dërguar një dosje voluminoze në lidhje me qindra kandidatë që morën patentë-shoferin në procese të dyshimta.

Administrata në Njësinë e Patentë Shoferit në Pejë konstatuar se në shumë dosje ka mosperputhje të dokumentacionit.

Disa nga të gjeturat:

• Ka raste kur kandidati i është nenshtruar provimit në pjesën teorike në vitin 2023 në Prishtinë, ndërsa në dosje figuron që i njëjti kandidat e ka kaluar provimin në vitin 2022 në Peje.

• Ka shumë raste që kandidatët i janë nënshtruar provimit në vitin 2022, ndërsa me certifikatën e Kryqit të Kuq janë pajisur në  vitin 2023. 

-Kemi gjetur që një pjesë e kandidatëve kanë kaluar provimin pa qenë fare në Kosovë.