Një aksident i rëndë trafiku ka ndodhur sot në Suharekë, ku është përfshirë një motoçikletë e një veturë dhe për pasojë motoçiklisti ka pësuar lëndime serioze
Rastin e ka konfirmuar edhe zëdhënësi i Policisë për rajonin e Prizrenit, Shaqir Bytyqi. Ai thotë se drejtuesi i motoçikletës është në gjendje të rëndë.
“Rreth orës 17:15, është raportuar një aksident mes një veture dhe një motoçiklete, drejtuesi i motoçikletës është në gjendje të rëndë dhe është dërguar për trajtim mjekësor në Prishtinë”, tha ai.
Bytyqi shtoi se në lidhje me rastin tani është duke u marrë njësia rajonale e trafikut në Prizren.