“Kosova e shpalli veten shtet sovran 15 vjet më parë. Cilat vende e njohin atë dhe si janë marrëdhëniet e saj sot me Serbinë?“, kështu nis artikulli i mediumit të Lindjes së Mesme, Al Jazeera kushtuar 15 vjetorit të Kosovës.

Më 17 shkurt bëhen 15 vjet nga shpallja e pavarësisë së Kosovës nga Serbia, transmeton Insajderi.

Serbia, Rusia, Kina dhe pesë vende të Bashkimit Evropian – Spanja, Sllovakia, Qiproja, Rumania dhe Greqia, nuk e njeh shtetësinë e Kosovës, të cilat njëkohësisht e kanë ndalur rrugën e saj drejt anëtarësimit në BE.

Rusia, një aleate e Serbisë, ka vënë veton ndaj anëtarësimit të Kosovës në Kombet e Bashkuara.

Ndërkohë, “Al Jazeera” ka publikuar një hartë që tregon shtetet që e kanë njohur, dhe ato që ende s’e njohin Kosovën si të pavarur.

Hartën mund ta shikoni duke klikuar në këtë LINK.

Historia e pavarësisë

Kosova dikur ishte pjesë e Jugosllavisë, e cila u formua pas Luftës së Parë Botërore në vitin 1918. Ajo përbëhej nga gjashtë grupe sllave dhe gjuha e saj zyrtare ishte serbo-kroatisht.

Pas Luftës së Dytë Botërore, u themelua Republika Socialiste Federative e Jugosllavisë, një federatë e përbërë nga gjashtë republika të ndara sipas vijave etnike: Bosnja dhe Hercegovina, Kroacia, Maqedonia, Mali i Zi, Serbia dhe Sllovenia.

Në vitin 1991, Sllovenia dhe Kroacia shpallën pavarësinë e tyre. Kjo shënoi fillimin e shpërbërjes së Jugosllavisë. Në vitin 1992, Maqedonia ndoqi shembullin.

Më 1 mars 1992, Bosnja dhe Hercegovina mbajti një referendum për pavarësinë. Serbët e Bosnjës donin të qëndronin pjesë e Jugosllavisë dhe bojkotuan votimin.

Kosova kërkoi autonominë e saj pas shpërbërjes së Jugosllavisë. Megjithatë, Serbia goditi shqiptarët etnikë që kërkonin pavarësinë, gjë që çoi në një fushatë të NATO-s kundër Serbisë në vitin 1999. Forcat serbe më pas u tërhoqën nga Kosova.

Në vitin 2022, dhuna shpërtheu për shkak të një debati për targat e automjeteve.

Kosova donte që personat që hynin me identifikim serb ta zëvendësonin atë me një dokument të përkohshëm gjatë qëndrimit të tyre në vend dhe planifikonte që shoferët serbë të vendosnin targat e Kosovës në automjetet e tyre.

Një marrëveshje paqeje po shtyhet nga vendet perëndimore për të zgjidhur tensionet, por sipas analistëve, marrëveshja është e dobët sepse nuk adreson njohjen e ndërsjellë midis dy shteteve.