“Mik i diellit” është kthyer tashmë në një frazë tërheqëse në botën “sociale” të Juventusit. Ngacmimi i drejtuar ndaj Vlahovic vjen nga trajneri Allegri. Është publikuar edhe përmes një video për të qeshur nga kanalet zyrtare të Juventusit.

Fjala është për sfidën e goditjeve dhe golave nga “pozicioni i pamundur”, pra pak metra pas vijës së portës, por në largësinë e flamurit të këndit. Një sfidë jo fort e zakonshme, që ka angazhuar protagonistët bardhezinj McKennie, Dusan Vlahovic dhe trajnerin Allegri.

Realisht, Allegri ndërhyn në “duelin” mes sulmuesit dhe mesfushorit bardhezi. Për t’u dhënë një mësim të mirë “fëmijëve”, siç i quan, që kanë nevojë të mësojnë ende nga trajneri i tyre, Max heq këpucët e sportit dhe çorapet, bëhet gati të godasë topin me këmbë zbathur.

Ndërkohë, Vlahovic e ngacmon: “Kujdes mister, ju lëndoni veten kështu, është e pamundur!” Në vend të kësaj, trajneri godet bukur nga “këndi i pamundur” dhe e shtyn topin në portë, në skajin e shtyllës, pak para se të shqiptojë frazën mburrëse “hej, miku i diellit…”

Si dëshmi e atmosferës së qetë që mbretëron te Juventusi, pas “mësimit” edhe Vlahovic tenton të godasë këmbëzbathur, duke ia dalë në mënyrë perfekte. “Bravo, – komenton Allegri, – me këmbë zbathur godet më mirë”. Përgjigja e Dusan ishte gati: “Sigurisht, atëherë duhet të luaj kështu”.