Lauren Phillips, një avokate 32-vjeçare nga Brooklyn, kishte një shtatzëni të lehtë. Phillips, e cila është vegane ishte në gjendje të ecte tre milje në ditë gjatë gjithë kohës. E vetmja pengesë ishte se pavarësisht se ishte tre herë e vaksinuar, ajo u infektua me koronavirus në tremujorin e dytë të shtatëzanisë.
Megjithatë, shtatzënia e saj vazhdoi pa incidente derisa ajo lindi një djalë të shëndetshëm 8 kilogramë në prill. Telashet nisën disa ditë më vonë, gjatë kohës kur po e ushqente djalin me gji ajo zbuloi se kishte preeklampsi, një ndërlikim i shtatzënisë që çdo vit rezulton në më shumë se 70,000 vdekje të nënave në mbarë botën. Normat e sëmundjes ishin rritur në mënyrë të qëndrueshme në Shtetet e Bashkuara për vite me radhë, por gjatë pandemisë, numri i rasteve u rrit, sipas mjekëve. Por, askush nuk e di saktësisht pse, shkruan The Uashington Post, transmeton Insajderi.
Ajo që dihet është ndikimi i koronavirusit në shëndetin riprodhues, nga cikli menstrual dhe fertiliteti i një gruaje deri te efektet e mundshme në zhvillimin e foshnjës.
Do të kalojnë dekada para se të dimë shkallën e efekteve të koronavirusit në shëndetin e njeriut. Por tani, më shumë se 2 vjet e 9 muaj që kur u shfaq – një periudhë në të cilën miliona shtatzëna janë infektuar me virusin të paktën një herë – studiuesit kanë vërejtur disa shenja pozitive, disa shqetësuese dhe shumë pika të tjera të të dhënave që ata ende nuk janë të sigurt se si të vlerësohen, veçanërisht pasi është e vështirë të ndash ndikimin e stresit të nënës gjatë pandemisë nga shkatërrimi i vetë virusit.
Kërcënimi viral
Koronavirusi nuk është virusi i parë që ka ndikuar në shtatzëninë dhe lindjen e fëmijëve. Gjatë pandemisë së gripit të vitit 1918, u rrit numri i lindjeve të foshnjave të vdekura dhe foshnjat e lindura vuanin nga nivele më të larta të problemeve kardiake.
Ndër gjetjet kryesore të deritanishme në lidhje me SARS-CoV-2 – sipas shumë llogarive, virusi më i studiuar ndonjëherë që ka infektuar njerëzit – janë se fertiliteti duket i paprekur edhe nga infeksionet, edhe nga vaksinat. Cikli menstrual mund të ndryshojë tek gratë pas vaksinimit, por pastaj gjithçka rregullohet.
Placentat
Placenta është një organ në mitrën e nënës që siguron oksigjen dhe lëndë të tjera ushqyese për beben.
Në pranverën e vitit 2020, kur zyrtarët shëndetësorë ende e quanin Covid-19 një sëmundje të frymëmarrjes, ideja që virusi mund të shkaktonte dëme në të (placentë) dukej e largët.
Më pas, vjeshtën dhe dimrin e kaluar, Amy Heerema McKenney, një patologe e Klinikës Cleveland, filloi të marrë raporte për lindjet e vdekura. Rastet dukej se shfaqeshin nga hiçi dhe me shpejtësi.
Një placentë normale është sfungjer dhe e errët, duke reflektuar gjakun ushqyes që rrjedh nëpër të. Derisa, në placentat e nënave që kishin humbur fëmijët, shihte se placenta dukej ndryshe. Çfarë ajo shihte ishte placenta të forta dhe me ngjyre të nxirë.
Ata teorizuan se një rrjedhje e reduktuar e gjakut në placentë, së bashku me inflamacionin nga një infeksion koronavirus, “mund të shpjegojë pjesërisht lidhjen midis covid-19 dhe lindjes së vdekur”.
Por, sapo Heerema McKenney dhe studiues të tjerë anembanë botës filluan të grumbullonin të dhëna dhe të diskutonin se si të reagonin, vala delta u tërhoq dhe kur mbërriti omicron, rastet thjesht u zhdukën.
Preeklampsia
Përveç rritjes së rasteve të lindjes së foshnjave të vdekura, u vë re edhe një rritje e preeklampsisë që paraqet një kërcënim shumë më të madh për shëndetin publik.
Pre-eklampsia (shkurt PE) është një sëmundje që shfaqet vetëm në shtatzëni. Ajo mund të prekë bebin, nënën ose të dy bashkë në më të shumtën e rasteve. Mund të shfaqet në çdo moment pas javës së 20-të të shtatzënisë.
Gazeta Insajderi
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2024 Gazeta Online Insajderi - Të gjitha të drejtat e rezervuara.
