Bashkimi Europian i ka kërkuar sqarime Kosovës për vendimin e Bankës Qendrore të Kosovës për ndalesën e përdorimit të valutave të huaja në vend, përfshirë edhe dinarin serb.

Zëdhënësi i Bashkimit Europian, Peter Stano, në konferencën e sotme për media në Bruksel, tha se Kosova dhe Serbia duhet që tema të tilla të adresojnë në dialog.

“Ne jemi ende duke e analizuar dhe duke kërkuar sqarime për këtë vendim, arsyet, motivet dhe implikimet që ai mund t’i ketë, por në përgjithësi Kosova dhe Serbia pritet që të shmangin veprimet e pakoordinuara që nuk shkojnë në frymën e normalizimit të raporteve dhe që mund të kenë ndikim negativ në stabilitetin në terren. Ne i nxisim të dyja palët dhe iu bëjmë thirrje që të adresojnë këto tema në kornizën e dialogut e lehtësuar nga BE”, shtoi ai.

Ndryshe dje, zëvendëskryeministri i Kosovës, Besnik Bislimi, tha se rregullorja e re e Bankës Qendrore të Kosovës (BQK) për “Operacionet me Para të Gatshme”, nuk sjell ndonjë ndryshim në listën e mjeteve të lejuara të pagesave.

Bislimi theksoi se në Republikën e Kosovës monedha e vetme e lejuar për përdorim si mjet pagese është Euro.