Një pikë për Brazilin, që është ndalur në një barazim 1-1 kundër Ekuadorit që është shumë pranë sigurimit të një bilete për në “Katar 2022”. Një ndeshje e zjarrtë, plot përplasje dhe që u paralajmërua që në minutën e parë kur Emerson Royal u ndëshkua me karton të verdhë.

Valencia në minutën tjetër iu afrua golit për Ekuadorin. Pesë minuta më pas erdhi goli i parë i ndeshjes, me Casemiro që pranë vijës fatale e shtyu topin drejt e në rrjetë. Festë te Brazili, që synon t’i mbyllë kualifikueset pa asnjë humbje dhe trajneri Tite që dëshiron të jetë i pari trajneri i Brazilit që e arrin diçka të tillë.

Në minutën e 13-të u regjistrua episodi “kung fu”, pasi portieri Dominguez goditi me shkelm sulmuesin Cunha të Brazilit. Ai moment ka bërë xhiron e internetit dhe për arbitrin nuk kishte dyshime për kartonin e kuq.

Alisson i Brazilit bën gjithashtu një ndërhyrje me këmbë të ngritur. Kartoni i kuq kthehet i verdhë me VAR, ndërsa në fundin e pjesës së parë Cunha iu afrua golit të dytë me një goditje nga jashtë zone.

45 minutat e dyta patën të tjera episode dhe dhjetë minuta pasi nisën u dha një penallti, pasi Estupinan u rrëzua në zonë. Me Var arbitri e anuloi. Ekuadori gjithsesi nuk u ndal dhe e gjeti rrugën e rrjetës.

Felix Torres goditi në mënyrë perfekte me kokë pas një goditjeje këndi dhe në minutën e 75-të rezultati u barazua. Në shtesë pati një tjetër karton të kuq e penallti, por VAR e shpëtoi Brazilin dhe portierin Alisson Becker për të dytën herë. Kështu ndeshja përfundoi 1-1 dhe dy skuadrat morën nga një pikë.