Sulmuesi suedez Zlatan Ibrahimovic ishte shumë i emocionuar dhe i lumtur përpara ndeshjes kundër Interit në Ligën e Kampionëve, por pasi bashkëlojtarët e tij pësuan dy gola të shpejtë, ai u kap nga kamera ku shfaqej tejet i zhgënjyer.
Ibrahimovic ka zhvilluar një sezon për t’u harruar dhe ndoshta më të keqin në karrierën e tij të pasur dhe pasi kreu një operacion në gju vitin e kaluar dhe ishte jashtë fushës deri në fund të shkurtit të këtij viti, ai luajti vetëm pesë ndeshje dhe pësoi një lëndim tjetër dhe ky sezon është për të i përfunduar.
Ai ndoqi ndeshjen e shokëve të tij kundër Interit mbrëmë nga tribuna e stadiumit San Siro dhe megjithëse ishte në humor shumë të mirë dhe i emocionuar para fillimit të ndeshjes, kjo ndryshoi në 11 minutat e para pasi shënuan Dzeko dhe Mkhitaryan. Dy gola të shpejtë për Interin.
Pasi pësuan golin e dytë, kamera është fokusuar menjëherë te Ibrahimovic dhe reagimi i tij ishte padyshim ai se si ndiheshin të gjithë tifozët e Milanit në botë.
Ai kapi kokën, dukej se e kishte të vështirë të shikonte nga fusha dhe se nuk mund ta besonte se çfarë makthi patën shokët e tij në fillim të lojës.
Në fund, Interi fitoi 2-0 dhe bëri një hap të madh drejt finales së Champions League. Ndeshja e kthimit do të luhet të martën e ardhshme, ndërsa këtë herë mikpritës do të jetë Interi.