Gazeta amerikane “Chicago Tribune” i ka kushtuar një shkrim rastit të pezullimit të certifikatës së biznesit të televizionit Klan Kosovës si dhe kompanisë Artmotion.

Editoriali i titulluar “Tensionet në Kosovë mes shqiptarëve dhe serbëve kanë çuar në një mbytje të tmerrshme të fjalës së lirë” në autorësi të Duggan Flanakin nis me zhvillimet në veri pas mbajtjes së zgjedhjeve në katër komunat atje.

“Në një lëvizje që çoi në mënyrë të parashikueshme në rritjen e tensioneve midis shumicës etnike shqiptare të Kosovës dhe pakicës së saj etnike serbe, kryeministri i Kosovës Albin Kurti së fundi vendosi kryetarë shqiptarë etnikë në katër qytete me shumicë serbe në veri të Kosovës pasi serbët etnikë bojkotuan zgjedhjet”.

Pas raportimit të gazetës në fjalë rreth tensioneve në këtë pjesë të Kosovës, pason raportimi rreth pezullimit të licencave të Klan Kosovës si dhe asaj të Artmotion.

“Në një seancë të papritur në mes të qershorit, Ministria e Industrisë, Ndërmarrësisë dhe Tregtisë e Kosovës pezulloi certifikatën e biznesit të stacionit televiziv Klan Kosova dhe kompanisë së saj amë, dhe ministria ngriti akuza kundër drejtuesve të kompanisë për krimin e pretenduar të emërtimit të qyteteve kosovare si serbe, në ato që përndryshe do të përbënin një gabim klerik”.

“Artmotion që nga viti 2018 ka ofruar shërbime televizive kabllore me abonim për një milion shtëpi kosovare përmes një formacioni 14-kanalësh në bashkëpunim me kompani të tilla si: Sony, Paramount dhe NBCUniversal”.

“Në mënyrën sesi Klan Kosova transmeton në rrjetin kabllor Artmotion, kjo lëvizje praktikisht e mbylli televizionin. Veprimi bëri që Instituti Ndërkombëtar i Shtypit t’u bashkohet organizatave të tjera të lirisë së mediave dhe gazetarisë për të shprehur alarmin, duke i quajtur veprimet e qeverisë kosovare “jashtëzakonisht serioze” dhe duke thënë se kjo përbën “kërcënim për ushtrimin e lirisë së mediave në Kosovë”.

“Vetë akti i informimit të Klan Kosovës për akuzat ishte një akt frikësimi, i pastër dhe i thjeshtë – një përfaqësues i vetëm i kompanisë u hodh para ministres Rozeta Hajdari dhe gjashtë-shtatë burokratëve pa e ditur qëllimin e takimit. Përfaqësuesit iu tha se një nga dokumentet e biznesit të Klan Kosovës përfshinte emrat “Pejë-Serbia” dhe “Gjakovë-Serbia” – përsëri, më së shumti një gabim klerik”.

“Chicago Tribune” poashtu përmend reagimin e madh ndërkombëtar dhe vendor që erdhi lidhur me këtë rast.

“Studiues të ndryshëm juridikë dhe avokatë të të drejtave të njeriut, duke përfshirë Asociacionin e Gazetarëve të Kosovës dhe ish-shefin e Protokollit të Kosovës, Adnan Merovci, argumentuan se pezullimi i licencës së Klan Kosovës ishte më shumë politike sesa ligjore”.

“E turpëruar nga analizat ligjore që tregojnë se i mungonte autoriteti për të pezulluar licencën, Agjencia Kosovare e Regjistrimit të Bizneseve të Ministrisë së Industrisë e revokoi pezullimin dhe në vend të kësaj ngriti kallëzim penal”.

Në shkrim citohet edhe gazetari Adriatik Kelmendi teksa flet për këtë çështje.

Ai në një shkrim të publikuar në uebfaqen e Klan Kosovës shpreh tronditjen se ky lloj censurimi ndaj mediave kryesore të vendit mund të ndodhë në një demokraci, e bërë për të frikësuar “një popull, ideali i të cilit për të jetuar lirisht nuk është shtypur kurrë”. Stacioni, sipas tij, “mban një qasje kritike dhe vëzhguese ndaj fenomeneve të ndryshme brenda institucioneve të qeverisë dhe shoqërisë”.

“Kjo lëvizje e qeverisë është një njollë në pretendimin e Kosovës për të qenë një shtet demokratik. “Ka fuqi që synojnë të mbyllin mediat. Sikurset në vendet si Rusia dhe Bjellorusia, si në Serbi dhe Korenë e Veriut”, citohet më tutje Kelmendi.

Editoriali i publikuar në të përditshmen e njohur amerikane “Chicago Tribune” ashtu siç nis edhe përfundon, me tensionet që kapluan veriun e vendit për të cilat theksohet se mbeten të larta si dhe rasteve të pezullimit të certifikatave të biznesit të Klan Kosovës dhe Artmotion.

“Pavarësisht nga potenciali për një zgjidhje të shpejtë të këtij gabimi klerikal, tensionet ndërmjet serbëve etnikë dhe shqiptarëve etnikë kosovarë — dhe midis Serbisë dhe Kosovës — mbeten të larta”.