Nënkryetarja e PDK-së, Vlora Çitaku, ka akuzuar kryeministrin Albin Kurti se ka ofenduar diasporën duke i quajtur ata analfabetë, gjë e cila sipas saj dëshmon se kreu i Vetëvendosjes po i shfrytëzon bashkatdhetarët vetëm sa për t’ua marrë votat.
“Albin Kurti i ka parë sondazhet e njëjta nga diaspora që i kemi parë edhe ne. Prandaj, ai sot i ofendoi bashkatdhetarët tonë në diasporë duke i quajtur analfabetë. Edhe PDK-ja ka pasur në zgjedhjet e kaluara rënie votash në diasporë, por ne asnjëherë nuk i kemi ofenduar e përbuzur bashkatdhetarët tonë”, shkruan Çitaku në Facebook.
Ajo thotë se PDK-ja e ka respektuar diasporën për shkak të kontributit për lirinë e Kosovës, por asnjëherë nuk e ka trajtuar në bazë të votës.
Sipas saj, kryeministri Kurti e sheh diasporën vetëm si votë që e përdor kur i nevojitet dhe pastaj e braktis.
“Kështu, ne e dënojmë gjuhën denigruese dhe poshtëruese të kryeministrit ndaj bashkatdhetarëve tonë. Albin, rregulloja jetën familjarëve të diasporës në Kosovë! Mjaft i ofendove edhe ata në Kosovë edhe ata në diasporë”, ka thënë Çitaku.