Gazeta Insajderi ka raportuar për një skemë mashtrimi të pronarit të shkollës “Albshkolla”, Driton Ajeti.

Tashmë Policia e Kosovës e ka arrestuar Driton Ajetin.

Ai gjendet në ndalim 48 orësh.

Kjo është konfirmuar zyrtarisht edhe nga institucionet e Kosovës, e po ashtu edhe nga avokati i Driton Ajetit, Bajram Sherifi.

Përvec arrestimit, në pronat e Driton Ajetit dhe në objektin “Albshkolla”, janë sekuestruar prova masteriale që pas ekzaminimit mund të sjellin dëshmi të reja.

Zëdhënësi i Policisë për Rajonin e Gjilanit, Ismet Hashani, ka treguar për konfiskimet që kanë ndodhur në pronat e biznesmenit gjilanas.

“Janë konfiskuar kompjuterë dhe gjësende të tjera në këtë aksion”, ka thënë shkurt Hashani.

Kompjuterët dhe materialet tjera që janë marrë në objektin e “Albshkollës”, mund të sjellin dëshmi të reja për pretendimet e punëtorëve për mashtrim nga ky biznes i Driton Ajetit.

Gjithçka që ndodhi në këtë hulumtim të Gazeta Insajderi

Më 16 shkurt të këtij viti në Gjilan do të hapej shkolla e parë shqipe online, do të quhej albshkolla. Kjo shkollë po synonte t’ua mësonte gjuhën shqipe fëmijëve të diasporës. Pra qëllimi ishte që të lidhen shqiptarët kudo që ata janë.

Rreth 400 persona u punësuan, numër i madh ishin mësimdhënës të tjerët infermierë, jurist e psikolog. Kjo pasi institucioni në fjalë do të pretendonte të vazhdonte edhe me shërbime laboratorike, mjekësore, psikologjike e shumë të tjera.

Pagat normalisht se iu kishin premtuar më të mira në krahasim me ato publike.

Mysafirët që do të merrnin pjesë në ceremoninë e hapjes nuk do e mendonin se diçka nuk po shkonte siç duhej.

Atë po e mendonin disa nga personat që tashmë kishin nënshkruar kontratë me biznesin në fjalë. Pronari i Albshkollës, Driton Ajeti ua kishte kërkuar nga 10 euro për organizimin e koktejit. Një gjë jashtëzakonisht e çuditshme, një projekt i sapo nisur që ua ofron stafit nga 800 euro rrogë e më shumë, me i kërku nga 10 euro për koktej.

Kjo nuk ishte e tëra. Një bisedë që ka siguruar Gazeta Insajderi në grupin e viber “Stafi albshkolla” një nga menaxheret ka kërkuar nga personat që ishin në grup t’iu nënshtrohen trajnimeve profesionale të obligueshme për secilin profil të organizuar nga vet kompania. E njëjta ka theksuar se duhet paguar nga 100 euro për trajnim dhe se vetëm ata që e kalojnë do kenë kontratë pune.

Për më shumë detaje shikoni videon e plotë: