Deklarata e rrezikshme dhe e pa vend e ministrit të Qeverisë Kurti, Liburn Aliu në nëntor të vitit të kaluar se “Kosova është projekt i përkohshëm” është përdorur sonte nga përfaqësuesi i Rusisë, në Këshillin e Sigurimit të OKB-së.

Përfaqësuesi i Rusisë në OKB, Dmitry Polyanskiy u shpreh se shqiptarët e Kosovës, e thonë këtë haptazi.

“Shqiptarët e Kosovës sot haptazi thonë se (Kosova) sot siç ekziston është vetëm, citojë, projekt i përkohshëm drejt Bashkimit me Shqipërinë, mbyllja e citatit…”, deklaroi Polyanskiy derisa pretendoi se edhe transformimi i FSK-së, në ushtri është sipas tij, shkelje e rezolutës 12/44.

Përfaqësuesi i Rusisë u shpreh se kërkesa e Bashkimit Evropian që të njihet shtetësia e Kosovës është e padrejtë.

Ai pretendoi se vetëm në 2023-n, Kosova i ka kryer 178 sulme etnike ndaj serbëve në Kosovë.

“Vetëm në vitin 2023, 178 sulme etnike janë kryer ndaj serbëve e pronave të tyre… Një fushatë për të uzurpuar trashëgimi kulturore, kishat po merren e vendet e vjetra ortodokse po emërohen si katolike…Ka krime ndaj njerëzimit e arrestime arbitrare, kërcënime e dhunë”, ka thënë ai.

/Insajderi