Një trafo e energjisë elektrike është djegur sot në afërsi të stadiumit “Fadil Vokrri” në Prishtinë.

Si pasojë e kësaj disa lagje të Prishtinës kanë mbetur pa energji elektrike.

Për këtë me njoftim ka dalë KEDS ku ka bërë të ditur se ende nuk dihet shkaktari i zjarrit.

“Ju informojmë se para rreth një ore ka shpërthyer një zjarr në Nënstacionin Prishtina 3, me ç’rast një numër i caktuar i konsumatorëve nuk kanë rrymë”, thuhet në njoftimin e KEDS.

KEDS ka shtuar se aktualisht po punohet në pastrimin e hapësirave të shkaktuara nga zjarri, ndërkaq nuk dihet akoma se çka e shkaktoi atë.

“Ekipet e KEDS-it ndodhen në vend dhe po punojnë në mënyrë intensive për kthimin në normalitet të gjendjes”, thuhet në njoftim.