SC Gjilani ia ka ndaluar paraqitjen trajnerit Ismet Munishi në emisionin “Ekipi A” në televizionin “ATV”. Gazeta online “Insporti” nga burime të sigurta merr vesh që klubi gjilanas ia ka ndaluar paraqitjen javore në këtë emision në rolin e analistit.

“Insporti” po ashtu ekskluzivisht raporton se Munishi dhe drejtuesit e televizionit “ATV” nuk kanë arritur të merren vesh për vazhdimin e bashkëpunimit. Arsyeja është rreth çështjes financiare.

Redaksia e “Insportit” ka kontaktuar me drejtorin e televizionit, Arbër Geci.

Geci në një prononcim për “Insportin” ka deklaruar se televizioni dhe trajneri Munishi nuk kanë kontratë për momentin dhe se nuk ka koment rreth çështjes se a ia ka ndaluar paraqitjen klubi me të cilin ka kontratë.

“Po, kemi pasur kontratë të përkohshme dhe ai vazhdon të paraqitet kurdo që e ftojmë. Por, për momentin nuk kemi kontratë me të”, deklaroi drejtori i ATV-së, Arbër Geci.

Ndërsa në pyetjen se a ka informacione se SC Gjilani ia ka ndaluar paraqitjen, ai u përgjigj duke thënë se nuk ka koment.

“Nuk kam koment për këtë”.

Televizioni “ATV” para se të fillonte transmetimin kishte paralajmëruar në mënyrë të jashtëzakonshme trajnerin karizmatik Munishi, si anëtar i emisionit sportiv “Ekipi A”, që udhëhiqet nga Bujar Mehmeti dhe Doruntina Alshiqi.

Në atë kohë, Munishi ishte pa skuadër pas shkarkimit nga klubi i Ballkanit.

Munishi është paraqitur edhe në “Ekipi A” në fillim të sezonit por duket se klubi gjilanas dëshiron që ai të fokusohet vetëm në skuadër, me qëllimin e vetëm fitimin e titullit të kampionit.

Megjithatë, trajneri prishtinas javën e kaluar ishte prezent në televizionin “KTV” në emisionin sportiv “SPORTI NË KTV” në rolin e analistit.

SC Gjilani pas 12 xhirove të zhvilluara në BKT Superligën e Kosovës nën drejtimin e Munishit renditet në pozitën e tretë me 21 pikë, një pikë më pak se sa lideri në tabelë, FC Drita. /Insporti.com/