Gjithsej 16 të dyshuar për përfshirje në një organizatë të madhe të trafikut të drogës nga Amerika Latine në Bashkimin Europian u arrestuan në Brazil, pas një operacioni të koordinuar nga Europol, Agjencia Amerikane për Zbatimin e Drogës (DEA), autoritetet kompetente të Mbretërisë së Bashkuar dhe Brazilit.

Në mesin e të arrestuarve është kreu i bandës, një shtetas serb me banim në Brazil, i cili është në listën e më të kërkuarve të BE-së.

Hetimi, i kryer si pjesë e Task Forcës së Europolit “Karteli Ballkanik”, ishte një përpjekje bashkëpunuese midis autoriteteve të zbatimit të ligjit në të dy anët e Oqeanit Atlantik. Sipas Europol, gjatë një viti e gjysmë të kaluar, autoritetet e përfshira kanë punuar pa u lodhur së bashku për të mbledhur informacion dhe për të koordinuar aktivitetet operacionale.

Në orët e para të 5 tetorit, një seri bastisjesh u zhvilluan në vende të ndryshme në Brazil (São Paulo, Ceará, Paraná, Rio Grande do Norte dhe Santa Catarina). Për pasojë u arrestuan 16 të dyshuar, shumë prej të cilëve kishin lidhje me organizatën kriminale “Primeiro Comando da Capital”.

Lideri serb ishte një nga objektivat më të rëndësishëm në ‘Kartelin Ballkanik’ të Europolit, për shkak të rolit të tij në organizimin e shumë dërgesave të drogës mes dy kontinenteve.

Autoritetet ishin në gjendje ta lidhnin këtë bandë kriminale me dy konfiskimet e fundit të kokainës : Njëra prej tyre përfshinte 5.7 ton kokainë të gjetur në një anije peshkimi në Cape Verde në prill 2022 dhe e dyta që përfshinte 1.3 ton kokainë në një anije peshkimi në Fortaleza në Brazil.

Në këto dy raste u arrestuan gjithsej 12 të dyshuar, dhjetë shtetas brazilianë dhe dy shtetas malazezë./abcnews.al