Trajneri i Llapit, Tahir Batatina është ndarë i kënaqur me fitoren e ekipit të tij. Llapi, të dielën triumfoi në Podujevë 3:0 ndaj skuadrës së Dukagjinit në ndeshjen e xhiros së dytë. Për Llapin, kjo ishte fitorja e parë këtë edicion, e cila ia ka siguruar pikët e para në tabelë.

Pas ndeshjes, Batatina ka insistuar se ndryshimi taktik që e bëri në pjesën e dytë ia siguroi fitoren. Llapi të tri golat i shënoi në pjesën e dytë.

“Jam i kënaqur me fitoren dhe paraqitjen e ekipit, sidomos në pjesën e dytë. Djemtë u angazhuan maksimalisht dhe kjo është vetëm fitorja e parë këtë edicion, ndërsa do të vazhdojmë të punojmë dhe përgatitemi për ndeshjet tjera”, ka thënë Batatina ndër të tjera për “Art Motion” pas ndeshjes.

“Në pjesën e parë nuk luajtëm edhe aq mirë, por në të dytën, bëmë disa ndryshime taktike dhe ato sollën edhe fitoren. Po ashtu, falënderoj edhe të gjithë llapjanët për përkrahje nga tribunat. Është e rëndësishme që të punojmë dhe vazhdojmë me paraqitje të mira ndeshje pas ndeshjeje”.