Federata e Futbollit e Kosovës ka publikuar aktvendimin e Gjykatës Themelore në Prishtinë, ku është refuzuar kërkesë padia e Gramoz Vokrrit, pasi që është cilësuar si e pabazuar.

Gjykata Themelore në Prishtinë-Departamenti për Çështje Administrative ka shpallur veten jo kompetente për të vendosur, ndërsa më pas Departamenti i Përgjithshëm i kësaj gjykate, e ka refuzuar si të pabazuar kërkesën e paditësit për anulimin dhe shtyrjen e vendimit për mbajtjen e zgjedhjeve për kryetar të FFK-së.

Vokrri, kishte dorëzuar kërkesë padinë në Gjykatën Themelore të Prishtinës kundër anulimit të vendimit dhe propozimin për pezullimin e vendimit të FFK-së, pasi që Komiteti Ekzekutiv e kishte quajtur të pavlefshëm kandidimin e tij.

Komiteti Ekzekutiv i FFK-së më 2 mars caktoi 6 prillin si datë për mbajtjen e zgjedhjeve për kryetar të Federatës së Futbollit të Kosovës. Pas aktvendimit të Gjykatës Themelore në Prishtinë kandidat i vetëm për postin e kryetarit të FFK-së ka mbetur Agim Ademi.