Minatorët në minierën e Stantërgut edhe sot po e vazhdojnë grevën brenda minierës. Ata nuk po pranojnë të hanë e as të pinë.
Këtë për Insajderin e ka konfirmuar kryetari i Sindikatës së Punëtoreve të “Trepçës”, Ibrahim Januzi.
Ai tha se të gjithë minatorët janë në grevë, por që gjendja e tyre shëndetësore nuk është e mirë.
Januzi shtoi se disa prej tyre deri tani kanë kërkuar ndihmë mjekësore.
‘’Të gjithë minatorët janë në grevë, ata nuk po pranojnë të hajnë as të pijnë asgjë, gjendja shëndetësore e tyre nuk është e mirë. Dy ose tre prej tyre janë në emergjence qysh nga dje. Bëjmë thirrje përmes jush që të reflektojnë, sepse askush nuk është duke u interesuar”, i tha ai Insajderit.
Minatorët grevistë kanë parashtruar tre kërkesa për Qeverinë e Kosovës.
“Realizimi pagës mujore me kohë nga data: 06–10 [në fillim të çdo muaji]. Shkarkimi i menaxhmentit (kryeshefit) dhe sigurimi shëndetësor dhe kushtet e punës” – thuhet në kërkesën e e minatorëve.
Ndërkohë, mbrëmë, njërit nga minatorët u dërgua për trajtim mjekësor pasi iu përkeqësua gjendja shëndetësore.