Besarta Breznica nga Rrjeti i Grave të Kosovës ka folur për një rast konkret se si Policia e Kosovës sipas saj i ndryshoi deklaratën një gruas e cila po dhunohej nga burri.

E ftuar në InDoks të Gazetës Insajderi, Breznica ka treguar në detaje rastin se si një burrë dhunues, për shkak të njoftësisë që kishte në Policinë e Kosovës, arriti t’ia ndryshojë deklaratën gruas së tij.

“Rrjeti i Grave të Kosovës në vazhdimësi pret shumë gra dhe burra në zyrat e rrjetit të cilët vinë dhe kërkojnë ndihmë qoftë me këshilla ligjore, monitorim apo edhe përfaqësim në gjykata. Mund të përmendi dy rastet që i kemi më të freskëta që i kemi trajtu ligjërisht dhe ju kemi dhënë këshilla ligjore, një prej rasteve është gruaja ka raportu në polici se ka dhunë nga burri dhe policët e kanë ndryshu deklaratën për shkak se burri ka pasur të njofshëm në organet kompetente, polici dhe në prokurori e gjyqësorë, atëherë policia, media dhe krejt të tjerët e kanë trajtu rastin sikur gruaja e ka rreh vjehrrën mandej ka ndërhy burri në këtë mes. Gjë që është e pavërtetë”, ka deklaruar ajo në InDoks.

Ajo sqaroi tutje se si i doli në ndihmë gruas RrGK-ja.

“Është dashtë me ndërhy ne së bashku me avokatin në fjalë, në mënyrë që zonjës në fjalë të i njihet statusi i viktimës dhe që të ekzaminohet në tërësi lënda. Prandaj ne kemi vazhdu tutje dhe kemi bërë ankesë tek IPK për të cilin ne jemi ende në pritje, pasi që policët e kanë thyer rregulloren dhe ligjin duke mos e treguar të vërtetën”, ka thënë Breznica.

Emisioni i plotë – InDoks | Rasti që tronditi Republikën