Kuvendi i Kosovës është mblidhur sot në seancë të re plenare në të cilën do diskutohet interpelancë për ministrin e Financave, Punës dhe Transfereve, Hekuran Murati për mos ekzekutimin e pagave ndaj grevistëve.

Kryetari i Aleancës për Ardhmërinë e Kosovës, Ramush Haradinaj, tha se mësuesit janë engjëjt tanë dhe ata nuk do të duhej të përfshiheshin në luftën e brendshme politike.

Ai ka shtuar se Kosova asnjëherë nuk guxon t’ua kthejë shpinën mësimdhënësve.

“Vasfije Krasniqi-Goodman është engjëll i ynë. Ajo jeton për ta dëshmuar dhimbjen tonë. Edhe Saranda Bogujevci është engjëll i yni, është treguese e asaj se nga kemi ardhur. Nuk guxon Kosova asnjëherë t’ia kthejë shpinën kësaj dhimbj. Edhe mësuesit janë engjëjt tanë. Nuk është dashur ata të vijnë në mesin e luftës sonë politike. S’ka logjikë me i lënë ata vetëm në këtë kohë”, tha Haradinaj.

Para deputetëve, Haradinaj tha se kjo situatë kërkon reflektim nga ana e Qeverisë.

“Nuk ka logjikë me i lënë mësimdhënësit pa paga. Kjo situatë është e  dhimbshme dhe kërkon reflektim nga ana e pushtetit!”, tha Haradinaj.