Kryeministri në largim i Kosovës, Ramush Haradinaj, ka pritur sot në takim grupin parlamentar CSU të Landit të Bavarisë, i kryesuar nga Thomas Kreutzer. Në këtë takim është diskutuar për mundësitë e shumta ekonomike që ofron Kosova, për investimet direkte gjermane.

Haradinaj përmes një postimi në llogarinë e tij në ‘Facebook’, ka thënë se rrugëtimi ekonomik i Landit të Bavarisë, duke qenë motor i rëndësishëm në gjenerimin e vendeve të punës, është shembull i mirë që Kosova duhet ndjekur.

“Delegacioni më i madh gjerman që deri tani ka vizituar vendin, sot dha konfirmimin për thellimin e marrëdhënieve ekonomike mes Kosovës e Gjermanisë.

I lumtur të pres grupin parlamentar CSU të Landit të Bavarisë, i kryesuar nga Thomas Kreutzer, me të cilët diskutuam për mundësitë e shumta ekonomike që ofron Kosova, për investimet direkte gjermane. Shpalosa para parlamentarëve gjerman planet konkrete të qeverisë për zhvillim ekonomik, rritjen e investimeve direkte dhe shpreha gatishmërinë tonë që në këtë drejtim të krijojmë partneritet të qëndrueshëm dhe afatgjatë me Gjermaninë”, ka shkruar Haradinaj.

Haradinaj, gjithashtu ka falenderuar parlamentarët gjerman për mbështetjen e vazhdueshme të Gjermanisë në procesin e liberalizimit të vizave për Kosovë.

“Rrugëtimi ekonomik i Landit të Bavarisë, duke qenë motor i rëndësishëm në gjenerimin e vendeve të punës, është shembull i mirë që Kosova duhet ndjekur, duke zbatuar në praktikë politikat për arsimin dual, mbrojtjen dhe mbështetjen e investimeve.