Kryeministri, Albin Kurti ia ka huqur sot me një informacion gjatë mbledhjes së qeverisë. Teksa po fliste për arrestimet nga Serbia të qytetarëve kosovar, tha se edhe Petrit Dula është duke u mbajtur në paraburgim atje, për këtë huqje të Kurtit një arsyetim e dha ministrja e Drejtësisë, Albulena Haxhiu, shkruan Insajderi.
Haxhiu në konferencën për media pas mbledhjes kurrsesi nuk e fajësojë Kurtin, tha se ishte gabim i shkruesve të fjalimit të kryeministrit.
Deklaroi se kryeministri ia ka theksuar se Dula është liruar.
“Më lejoni që para se të fillojmë, të bëjmë një sqarim në raport me fjalën e kryeministrit Kurti. Menjëherë pasi që kryeministri Kurti e përfundoi fjalën e tij, u konsultuam bashkë në raport me Petrit Dulën dhe Nezir Mehmetajn, i cili, ky i fundit po mbahet në burgje në Serbi. Ndërkaq, sa i përket Petrit Dulës, kryeministri më theksoj se i njëjti është liruar, mirëpo edhe Petrit Dula edhe Nezir Mehmetaj janë futur në një paragraf. Andaj, më lejoni që t’ua sqaroj; ideja ka qenë që të flasim për trajtimin mizor dhe po ashtu padrejtësitë që Serbia vazhdon t’ua bëjë qytetarëve tanë duke i mbajtur ata në paraburgim pa asnjë fakt dhe pa asnjë provë”, u shpreh ajo para gazetarëve përcjell Insajderi.
Çka tha Kurti?
Petrit Dula ishte liruar me 7 prill të 2023-ës nga burgu në Serbi. Ndërkohë sot kryeministri u shpreh se Serbia përveç arrestimit të fundit të Hasan Dakajt, po vazhdon t’i mbajë në burg edhe Nezir Mehmetajn e Petrit Dulën.
“…Serbia vazhdon të mbajë në paraburgime dhe 2 qytetarë të tjerë të Republikës së Kosovës, Nëzir Mehmetaj dhe Petrit Dula”, deklaroi kryeministrit pasi foli për arrestimet e fundit.
“Të dy të mbajtur nga autoritetet serbe për gjoja kryerjen e krimeve kundër popullatës civile gjatë luftës në Kosovë. Mehmetaj ka qëndruar me muaj të tërë në paraburgim pa aktakuzë në kundërshtim edhe me vetë ligjet e Serbisë, të gjetura këto që i ka theksuar edhe Fondi për të Drejtën Humanitare në Serbi“.
“Petrit Dula vuan burgimin bazuar në vendimin e gjykatës së shkallës së parë në Beograd, përkundër që dëshmitari në rastin e tij ka mohuar që Dula është autorë i veprës edhe kur është marrë në pyetje nga autoritet në Podgoricë në vitin 2011”, ka thënë Kurti.
Kurti ka thënë tutje se ministrja e Drejtësisë, Albulena Haxhiu, ka kërkuar ekstradimin e Nezir Mehmetaj dhe Petrit Dulës nga Serbia, por se s’kanë pranuar përgjigje.