Kryeministri në detyrë i Kosovës, Avdullah Hoti, që është edhe kandidat i Lidhjes Demokratike të Kosovës për zgjedhjet e 14 shkurtit, ka thënë se Shtetet e Bashkuara të Amerikës i patën ndërprerë komunikimet me Qeverinë e Kosovës, në kohën kur ajo udhëhiqej nga Lideri i LVV-së, Albin Kurti.

Në atë kohë Hoti që mbante postin e zëvendëskryeministrit, ka thënë se atij në javët e fundit të qeverisjes VV-LDK, atij i është komunikuar ndërprerja e komunikimit me SHBA-në.

“Nuk mund t’i detyroja zyrtarët amerikanë të takojnë zyrtarët e Vetëvendosjes. Unë i kam kërkuar ish-kryeministrit që të shkojmë si delegacion dhe të komunikojnë por ai i kishte teoritë e veta konspirative. Kërkesë e imja ka qenë që ne të koordinojmë vendimmarrjen tonë me zyrtarët amerikan dhe ka qenë insistimi i tij me teori të ndryshme. Ne ja kemi bërë të qartë ose të bashkëpunojmë me ta që të mos vijmë në situatën që qeveria e Kosovës të ketë mungesë komunikimi me SHBA ose dalim nga koalicioni. Po, madje edhe mua më është komunikuar. Në javët e fundit të qeverisjes”, tha ai në Politico të Kanal 10.

Ai ka thënë se është i bindur që LDK do të fitojë në zgjedhjet e 14 shkurtit.

“Kemi arritur ta mobilizojmë elektoratinë tonë tardicional dhe jemi të bindur se ne do t’i fitojmë këto zgjedhje”, tha ai.