Presidenti serb, Aleksandar Vuçiq, ka kërkuar falje që i cilësoi sllovenët “të neveritshëm”, duke sqaruar se ai i referohej vetëm politikanëve të tyre. Ai tha se ishte një reagim ndaj asaj që ai i konsideronte si politika dhe deklarata antiserbe.

“Nëse kam ofenduar dikë, dua t’i kërkoj falje gjithë publikut slloven, dhe në të njëjtën kohë, dua të them se nuk do t’u kërkoj falje politikanëve sllovenë sepse ata ndjekin një politikë të neveritshme ndaj Serbisë”, tha Vuçiç dy ditë më parë në Nju-Jork, ku mori pjesë në seancën e Këshillit të Sigurimit të Kombeve të Bashkuara për Kosovën.

Ai sulmoi Slloveninë, një anëtare jo e përhershme të Këshillit të Sigurimit, duke e akuzuar atë se ishte pjesë e një “organizimi” me SHBA-në dhe Zvicrën, për të lejuar delegacionin e Kosovës të sjellë të mbijetuarit e dyshuar të përdhunimit nga forcat serbe, gjatë luftës së viteve 1998-1999 në seancë, një veprim që ngjalli zemërim nga delegacioni serb.

“Është e vështirë të thuhet se kush ishte më i neveritshëm, sllovenët apo dikush tjetër”, tha Vuçiç në fillim të kësaj jave.

Vërejtjet shkaktuan reagim të shpejtë nga Lubjana. Ministrja e Jashtme, Tanja Fajon, i quajti ato një fyerje për të gjithë kombin slloven.