Trajneri i njohur kroat i futbollit, Mirosllav Çiro Blazheviq, nuk është në gjendje të mirë shëndetësore, por së shpejti i vjen datëlindja (me 10 shkurt mbush 88 vite), kështu që të paktën për një kohë do t’i harrojë të gjitha shqetësimet.

Ish trajneri i famshëm i klubit të futbollit Prishtina në vitin 1985, po kalon momente shumë të vështira.

“Jam shumë i sëmurë… Është shumë e vështirë për mua. Kjo sëmundje e ndyrë më ka përfshirë. Po mundohem, po vuaj. Kam shumë dhimbje, kaq”, – tha Çiro për “story.hr”.

“Kanceri u përhap në të gjitha kockat e mia, dhe në vendin më të keq dhe më të rrezikshëm, mëlçinë. Dhe po shkatërron gjithçka ngadalë. Mund të vdes në çdo moment”, tha Çiro.