Talat Xhaferi kryeministër i qeverisë të Maqedonisë së Veriut, pas përzgjedhjes si udhëheqës i kabinetit të qeverisë teknike, ishte parë me puro në prani të kryetarit të BDI-së, Ali Ahmeti dhe bashkëpartiakëve të tjerë.
Ky veprim i tij kishte nxitur kritika dhe reagime duke qenë se Kuvendi atje kishte miratuar Ligjin për ndalimin e pirjes së duhanit.
Për këtë Xhaferi tha se ishte një gabim dhe se mban përgjegjësi si të gjithë qytetarët.
“Sigurisht që edhe për këtë ka një përgjigje: Ka institucion përkatës që mund të bëjë ankesën përkatëse, unë do të mbaj përgjegjësi si të gjithë qytetarët. Ishte një gabim, por ndoshta atmosfera ishte e tillë dhe ndodhi. Pra, nuk po e mohoj që është diçka që nuk duhej të ndodhte, prandaj ka një institucion që mund të reagojë dhe unë do të përgjigjem në përputhje me reagimin e tyre”, tha ai në një intervistë për DW.
Talat Xhaferi është zgjedhur kryeministër i Qeverisë teknike të Maqedonisë së Veriut me 28 janar, duke u bërë shqiptari i parë që do të mbajë këtë post në këtë shtet.
Qeveria teknike e Xhaferit ka mandat organizimin dhe mbarëvajtjen e zgjedhjeve parlamentare të caktuara për 8 maj.