Minatorët e “Trepçës” kanë paraqitur katër kërkesa, për cilat minatori, Gani Osmani konfirmoi për Insajderin se janë pajtuar me përfaqësuesit e Ministrisë. Por, nga Bordi i Përkohshëm i kësaj ndërmarrje po thonë se janë pajtuar vetëm prej tri prej tyre.

Si rrjedhojë, Bordi i Përkohshëm i Drejtorëve është pajtuar që pagat e minatorëve të dalin në mes datës 6 dhe 10 të çdo muaji, të shpallet konkursi për Kryeshefin Ekzekutiv dhe të përmirësohen kushtet e sigurisë së minatorëve.

Bazuar në njoftim, minatorët i kanë kërkuar Bordit të Përkohshëm të Drejtorëve që të tërhiqen të gjitha vendimet e nxjerra gjatë grevës, pikë për të cilën këta të fundit kanë thënë se do ta analizojnë.

“Ne, Bordi i Përkohshëm i Drejtorëve jemi në pajtueshmëri të plotë me kërkesat e paraqitura nga ju, sepse janë dhe prioritete tona tashmë”, thuhet në letrën e publikuar nga ta.

“Ne, Bordi i Përkohshëm i Drejtorëve pajtohemi me pikat 1, 2 dhe 3. Kërkesa e fundit e letrës tuaj, ju sigurojmë që do të analizojmë dhe shqyrtojmë në vijimësi vendimet e KE-së, përfshirë ato nga data 27.10.2023”, vijon njoftimi i Bordit.

Mbrëmë në mesnatë, minatorët e “Trepçës” e kanë ndërprerë grevën, pasi kanë marrë premtimin se kërkesat e tyre do të plotësohen.

Kujtojmë se një numër i konsiderueshëm i minatorëve kanë kërkuar ndihmë mjekësore për shkak përkeqësimit të gjendjes shëndetësore sa po qëndronin brenda minierës.

/Insajderi