Bordi Drejtues i Shërbimit Spitalor Klinik dhe Universitar i Kosovëska konfirmuar se në mbledhjen e  mbajtur sot  ka miratuar dorëheqjen e Drejtorit të Përgjithshëm të Shërbimit Spitalor dhe Klinik Universitar të Kosovës, Valbon Krasniqi.

Në njoftimin për media thuhet se Bordi Drejtues i SHSKUK-së me këtë rast duke vlerësuar kontributin e deritanishëm të Krasniqit e falënderon për bashkëpunimin e treguar.

Në vend të Krasniqit është caktuar, Pranvera Zejnullahu-Raçi.

“Ju njoftojmë se, bazuar në kompetencat e veta, Bordi Drejtues i SHSKUK-së ka emëruar U.D. të Drejtorit të Përgjithshëm të Shërbimit Spitalor Universitar të Kosovës, Dr. Pranvera Zejnullahu-Raçi”, thuhet në njoftim.

Kujtojmë se javën e kaluar pritej që Krasniqi të shkarkohej nga bordi për shkak se Raporti i Zyrës së Auditorit kishte nxjerrë një sërë parregullsish që janë bërë brenda SHSKUK-së.

Zyra Kombëtare e Auditorit (ZKA), ka nxjerr katërmbëdhjetë shkelje që dyshohet se janë bërë nga ana e Shërbimit Spitalor Klinik Universitar gjatë vitit 2021. Bazuar në të dhënat e ZKA-së, Qendra Klinike Universitare e Kosovës dhe spitalet rajonale kanë keqmenaxhuar buxhetin. Shqetësuese janë gjetjet në procesin e tenderëve.

ZKA javën e kaluar konfirmoi për Insajderin se rastet i ka dërguar në Prokurori, e këta të fundit që ato i kanë shpërndarë nëpër prokuroritë kompetente.

Valbon Krasniqi mbanë pozitën e drejtorit të ShSKUK-së që nga shkurti i vitit të kaluar.