Gjatë ditës së djeshme u shemb dheu në rrugën “Gazmend Zajmi” në lagjen e Muhaxherëve, në një objekt banesor ku është në ndërtim e sipër nga Kompania ‘Cima Construction’. Si pasojë e shembjes së dheut një veturë ka rënë poshtë në gropë, dhe është çarë muri i një shtëpie, shkruan Insajderi.
Në vendin e ngjarjes dje kishin dalur edhe inspeksioni i Komunës së Prishtinës.
Gazeta Insajderi ka kontaktuar me kompaninë e cila është duke e kryer ndërtimin e objektit banesor ‘Cima Construction’ të cilët thanë se nuk e dinë se faji i kujt është, pasi që çdo gjë e kanë punuar konform rregullave siç ua ka dhënë lejen Komuna e Prishtinës.
“Ata smuna me thane une se i kujt o faji, na kemi punu sipas projektit, qe është dhëne me leje ndërtimore nga Komuna e Prishtinës, konform rregullave, po tash ka rrëshqite dheu, këto ndodhin, ndodhin edhe ne vende te tjera me rrëshqit dheu, dmth ajo është punua sipas lejes se Komunës. Komuna e ka lëshu lejen e ndërtimit, lejen e sigurimit, është punua komform krejt standardit qysh punohet, as na s’mujna me ditë pse ka ndodh”.
E përkundër që thonë se nuk është faji i tyre për rrëshqitjen e dheut, nga Kompania thanë se kanë marrë hapa që t’i kompenzojnë dëmet e shkaktuara ndaj qytetarëve.
“Na kemi marre hapa për stanimin e situatës aty dmth me rregullu gropën, me siguru punishten me vazhdu punën, ne si kompani do ta rregullojmë atë pjesën e parkingut të kojshive”.
Derisa, nga Cima Construction treguan për Insajderin edhe për veturën e cila kishte rënë dje në fund të gropës nga rrëshqitja e dheut.
“Vetura u kon e dikujt, mirëpo është rregullu çështja e veturës, zyrtaret e kompanisë tonë kanë biseduar me pronarin, qa ka nevoje ose naj dëm ne i përgjigjemi”, thanë nga ‘Cima Construction’ për Insajderin.