Deputetët e Malit të Zi kanë votuar që Andrija Mandiq të bëhet kryetari i ri i Kuvendit.

Ky votim erdhi pas një diskutimi të gjatë sot në seancën konstituive për zgjedhjen e drejtuesve të Parlamentit të Malit të Zi.

Mandiq është drejtues i koalicionit “Për të ardhmen e Malit të Zi”, si dhe njihet si politikan proserb.

Pas kryetarit, sot do të votohet edhe Qeveria e re e Malit të Zi, shkruan Vijesti.

Në votim morën pjesë 49 deputetë , nuk pati asnjë votë kundër.

Në votim nuk morën pjesë deputetë nga Partia Demokratike e Socialistëve, Partia Boshnjake, Socialdemokratët, Partia Liberale, Bashkimi Demokratik i Shqiptarëve, Nisma Qytetare Kroate dhe Lëvizja Qytetare URA.

Pse Mandiq është njeriu kryesor i Vuçiqit në Mal të Zi?

Andrija Mandiq, kandidati i Frontit Demokratik, doli i treti në zgjedhjet presidenciale në Mal të Zi, pas Milo Gjukanoviqit dhe Jakov Milatoviqit, të cilët kaluan në raundin e dytë. Në balotazh Milatoviq arriti të fitoi dhe është zgjedhur presidenti i Malit të Zi.

Edhe pse presidenti i Serbisë, Aleksandar Vuçiq, nuk ka përkrahur publikisht asnjë kandidat, një pjesë e publikut nuk ka asnjë dyshim se ai ka qenë prezent në zgjedhjet malazeze – si përmes donacioneve për Mandiqin, ashtu edhe duke skualifikuar kundërshtarin e tij më të madh në mesin e votuesve.

Politikani i preferuar i Vuçiqit në Mal të Zi është padyshim Andrija Mandiq, të cilit dikur i dhuroi një dekoratë si president i Serbisë. Këtë herë ai nuk e mbështeti publikisht në zgjedhjet presidenciale, por gjithçka tregon se ka marrë çdo lloj ndihme tjetër. Dhe veçanërisht në fillim të fushatës.

Milka Tadiq Mijoviq, drejtoreshë e Qendrës për Gazetari Hulumtuese në Mal të Zi, thotë për gazetën “Nova” se vetë fakti që falë të dhënave për të drejtën e votës, të cilat kanë ardhur nga Serbia për herë të parë në histori, flet për faktin se Serbia ndërhynë që në fillim në procesin zgjedhor.

“Këto të dhëna e eliminuan Milojko Spajiqin (nga gara zgjedhore)”, thotë Tadiq Mijoviq.

Spajiq është lideri i lëvizjes Evropa tani, i cili në kohën e kandidimit për president kishte nënshtetësi serbe dhe rezidencë në Serbi. MPB-ja e Serbisë konfirmoi se ai ka rezidencë pranë Komisionit Zgjedhor të Malit të Zi, dhe kjo automatikisht e skualifikoi atë nga gara zgjedhore.

Nga ana tjetër, Andrija Mandiq ka vite që ka thënë se ka nënshtetësi serbe, por Ministria e Punëve të Brendshme të Serbisë mohoi se ai banon në Beograd, ndërsa vetë Mandiq ka kërkuar që pas zgjedhjeve të diskutohet për shtetësinë e tij.

Sipas ligjeve malazeze, shtetësia e dyfishtë e Serbisë dhe Malit të Zi nuk lejohet.

Tadiq – Mijoviq thekson se nuk është sekret se Vuçiq gjithmonë ka mbështetur Frontin Demokratik dhe Mandiqin në Mal të Zi dhe se është e qartë se kush ishte i preferuari i tij.

Të dhënat zyrtare tregojnë se në mënyrë indirekte Andrija Mandiq ka marrë ndihmë financiare edhe nga Serbia. Përkatësisht, “Shtëpia e Serbisë”, e cila është themeluar nga presidenti Aleksandar Vuçiq me paratë e qytetarëve të Serbisë, ka dhuruar 20 mijë euro për fushatën e Mandiqit. Kjo ishte edhe shuma më e lartë që ishte ndarë për fushatën e Mandiqit në 15 ditët e para pas shpalljes së zgjedhjeve.

“Shtëpia serbe” është themeluar me vendim të Vuçiqit dhe për të janë ndarë rreth 3.4 milionë euro nga buxheti i Serbisë. Është dashur të merret me ruajtjen e identitetit dhe kulturës serbe në Mal të Zi, por zyrtarisht është një ndërmarrje private e një numri politikanësh proserbë në shtetin fqinj dhe merret me organizimin e takimeve dhe panaireve.

Të dhënat zyrtare tregojnë gjithashtu se Andrija Mandiq padyshim kishte hapësirën më të madhe mediatike në televizionet lokale. Siç raporton Radio Evropa e Lirë, Agjencia për Media Elektronike në një raport paraprak për përfaqësimin mediatik gjatë fushatës zgjedhore për President të Malit të Zi ka njoftuar se Mandiq ka hapësirën më të madhe mediatike me 34 për qind të përfaqësimit.

Nga gjithsej pesë, katër televizione janë në pronësi të të huajve, kryesisht kompani serbe, dhe të paktën dy kanë pronarë të afërt me Aleksandar Vuçiqin. Siç raporton REL, pronar i Prva është Sërgjan Milovanoviq, vëllai i të cilit është zyrtar i Partisë Popullore Serbe në Nish.

Pronari i TV Adria është biznesmeni serb Bratislav Stoiljkoviq. Vitin e kaluar, Agjencia e Sigurisë Kombëtare (Malit të Zi) e ndaloi hyrjen në Mal të Zi.