Kryeministri, Albin Kurti procesin e djeshëm të zgjedhjeve në katër komunat veriore të vendit e ka cilësuar si të qetë.
“Zgjedhjet për kryetar në katër komunat veriore të Kosovës dhe për kuvendet komunale në dy sosh, dje u zhvilluan qetë dhe pa incidente. Falënderoj KQZ-në për organizimin, policinë e Kosovës për sigurinë dhe qytetarët për mbështetjen”, ka shkruar ai në Facebook.
Ndërkaq, pjesëmarrja e ulët e votuesve, sipas Kurtit ka qenë si shkak i kërcënimeve të Beogradit kundrejt qytetarëve që banojnë në këto zona.
“Atmosfera ishte ajo e frikësimit dhe shantazhit andaj edhe dalja e qytetarëve në zgjedhje ishte e ulët. Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë”, ka shtua ai.
Tutje, Kurti është shprehur optimist për punën e të zgjedhurve të rinj.
“Uroj kryetarët dhe asamblistët e zgjedhur dje. Ata duhet të punojnë me përkushtim dhe të shërbejnë pa dallim. Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë. Për mirëqenien e qytetarëve dhe të drejtat e tyre”, ka thënë Kurti./Insajderi