Kryeministri i Kosovës, Albin Kurti, u ka bërë thirrje të rinjve dhe të rejave të komunitetit joshumicë të aplikojnë për punësim në institucionet publike të vendit.

Në një video të shpërndarë nga Kurti, ai flet më detajisht lidhur me këtë çështje.

“Para këtij adresimi, keni mundur të shihni dhe dëgjoni përmes fushatës ‘Shpërndaje barazinë’ shumë tregime frymëzuese të bashkëqytetarëve tanë nga komunitetet rom, ashkali dhe egjiptian në Kosovë, të cilët kanë kontribuar për fuqizimin e institucioneve tona publike. Po ashtu, kanë pasur edhe shumë sfida dhe vështirësi,” thotë Kurti në video.

“Qeveria e Kosovës, në bashkëpunim me organizatën ‘Zëri i Romëve, Ashkalinjëve dhe Egjiptianëve’, nisi këtë fushatë për t’i inkurajuar të rinjtë nga këto komunitete që të përfshihen aktivisht në jetën publike dhe shoqërore,” vazhdoi ai.